Atzo Tafallako Udaletxean Ager Vasconum Literatur Lehiaketaren hirugarren edizioa aurkeztu zen. Tafalla, Erriberri, Lizarra, Zangoza eta Lodosako Udalek zein Irantzuko Mankomunitateak antolatutako lehiaketa honetan 12 eta 30 urte bitarteko gazteek parte hartu ahal izango dute, olerkigintza eta narratiba modalitate ezberdinetan banaturik.
Prentsaurrekoan herrietako hainbat arduradun izan ziren: Arturo Goldaracena, Tafallako alkatea; Angel Navallas, Zangozako alkatea; Unai Errazkin, Lizarrako zinegotzia; Andoni Lacarra, Erriberriko alkatea; Cristina Arconada, Tafallako Euskara Batzordeko lehendakaria; Ana Flamarique, Tafallako euskara teknikaria; Alfredo Dufur, Irantzuko Mankomunitateko euskara teknikaria eta Kiko Escobar, Lizarrako euskara teknikaria.
2014.urtean Tafalla aintzindaria izan zen bere eskualdeari bideratutako lehiaketa batekin, 2015ean Erdialdea eta Erriberagoitiara zabaldu zen eta bi urte beranduago egun antolakuntzan dabiltzan udalerrien arteko hitzarmena sinatu zen. Goldaracenak “Zonalde honetan euskarazko hezkuntzak daukan garrantzia”azpimarratu zuen eta deialdia zabaldu zien ikastetxeei lehiaketa haien egitarauetan naturaltasunez sartzeko. Lacarraren hitzetan, “Lehiaketaren oinarriak finkaturik daude iada, orain hurrengo legislaturen kontu geratzen da bere jarraipena. Espero dezagun ere gutxinaka herri gehiagotara zabaldu ahal izatea”.
“Euskal literaturaren produkzioa sustatu nahi dugu, eta era berean hau gure eskualdean irakurria izatea. Lehiaketa erreferenteak sortzeko eta gazteak idaztera animatzeko modu egokia izan daiteke, gainera, sari bezala ematen diren diska zein liburuak sustagarri polita izan daitezke”, azaldu zuen Ana Flamarique teknikariak.
Azkenik, antolatzaileek Elkar eta Altaffaylla fundazioen laguntza, baita epaimahia osatzen duten pertsonen lana eskertu nahi izan zuten.
Obrak aurkezteko epea maiatzaren 8an amaitzen da eta epaileek ekainaren 6ª baino lehen jakinaraziko dituzte emaitzak. Aurtengo sari banaketa Zangozan izango da ekainak 13 ostegunean.
LEHIAKETAREN OINARRIAK
Deja un comentario