Globulu gorriak oxigenoa eramaten dute ehunetara eta hemoglobina izeneko proteina bat daukate oxigenoaren garraio horretan parte hartzen duena. Hemoglobina edota globulu gorrien maila baxua denean, pertsona batek anemia duela esan dezakegu.

Anemiaren sintomak oso desberdinak izan daitezke. Nekea eta ahultasuna dira ohikoenak, baina takikardia, zorabioak, buruko mina, arnasa hartzeko arazoak, azalaren zuritasuna, hilea eta azkazalen ahultasuna edo edema ere agertu daiteke.

Gerta liteke oso sintoma gutxi edukitzea edo ia sintomarik ez edukitzea anemia denbora luzean zehar garatzen bada, batez ere pertsonak kirola egiteko ohiturarik ez duenean.

Anemia mota ezberdinak existitzen dira globulu gorrien tamainaren arabera, hemoglobinaren kantitatearen arabera edo anemiaren jatorriaren arabera. Gaur burdin faltagatik agertzen den anemiari buruz hitz egingo dugu gure gizartean ohikoena izateagatik, batez ere emakumeen artean.

Hala ere, ez da ahaztu behar beste anemia mota batzuk existitzen direla eta edozein sintomaren aurrean mediku batek egin beharko duela diagnostikoa.

Burdinak aipatutako hemoglobinaren sintesian eta funtzionamenduan parte hartzen du, beraz hau falta denean hemoglobinarekin arazoak egongo dira eta anemia agertuko da.

Burdin falta hori arrazoi desberdinengatik eman daiteke: odol galeragatik (zauri batengatik edo, oso ohiko kasua, menstruazioarengatik), elikaduran beharrezko burdina ez hartzeagatik, burdin beharrak handiagoak izateagatik (adibidez haurdunaldian edo edoskitzean), burdinaren absortzio txarrarengatik (medikamentu batengatik edo hainbat gaixotasunengatik), infekzio batengatik, etab.

Anemia mota honetan hasieran sintomak arinak izaten dira eta pixkanaka agertzen dira. Esan bezala, suminkortasuna, buruko mina, nekea eta hilea eta azkazalen ahultasuna dira ohikoenak. Edozein susmoren aurrean medikuarengana joan beharko gara berak egoera baloratu dezan.

Normalean, anemia honen tratamendua burdina ematea izaten da. Printzipioz ahoz hartuta, baina beste forma batzuk existitzen dira. Tratamendu hau jartzen badigute, kontutan izan beharko da baraurik hartu behar dela eta hobe C bitaminarekin batera, burdinaren absortzioari laguntzearren.

Gainera, tratamendua luzea izaten da (hilabete batzuetakoa) eta sintoma intestinalak ohikoak dira, adibidez gorozkiak ilunak bihurtzen dira baina horrek ez gaitu izutu behar.

Anemia mota honekin erlazionatutako argibide batzuk aurkezten dira

  • Ez dira burdin suplementuak prebentzio bezala gomendatzen ez dagoelako demostratuta hauen onura.
  • Elikadura orekatua bilatuko da beti, honen bidez elikagai esentzial guztiak jasotzearren.
  • Burdin kantitate handia duten janariak gomendatu daitezke pertsonaren elikaduran burdinaren kantitatea egokia ez dela dakigunean. Adibidez arrautzak, berberetxoak, txirlak, muskuiluak, sardinak, gibela, odolkia, untxia, garagar legamia, dilistak, fruitu lehorrak, etab.
  • Alimentu batzuek burdinaren absortzioa saihesten dute, kafea edo tea adibidez, medikamentu batzuek bezala ere.
  • Edozein zalantzaren aurrean profesional bati galdetu informazio egokia jasotzearren.