Azido hialuronikoa gaur egun oso modan dagoen osagai kosmetikoa da. Ziur aski aldizkari edo iragarki askotan ikusi duzu nola kosmetika marka desberdinek osagai honen erabilpena bultzatzen duten.

Publizitate guzti honek gure aurpegi errutinan ezinbesteko aktiboa dela pentsatzera eramaten gaitu, horregatik da hain garrantzitsua ulertzea zeintzuk diren azido hialuronikoaren onurak eta zein den bere eragina gure azalean, gu geuk aukera dezagun hau erabili edo ez eta nola egin.

Azido hialuronikoa gure gorputzean berez aurkitzen den substantzia da, bai azalean, bai artikulazio eta kartilagoetan ere. Segun eta non aurkitzen den funtzio desberdinak betetzen ditu, baina gaur azaleko azido hialuronikoari buruz arituko gara.

Zer da?

Esan dugun bezala, azaleko osagai naturala da eta kolageno eta elastina zuntzekin gurutzatuta aurkitzen da hauen funtzionamenduari lagunduz. Azalaren hidratazioa mantentzen du honen leuntasuna eta elastikotasuna handituz.

Bere hidratazio gaitasun handi hori azido hialuronikoak ura atxikitzeko duen ahalmenari lotuta dator, izan ere bere pisua mila aldiz uretan atxikitzeko gai da horrela deshidratazioa saihestuz.

Azala hidratatzeaz gain, adinaren lehengo seinaleei aurre egiteko ere oso erabilgarria da, lehenengo zimur horiek betetzeko gai izanik eta, esan bezala, kolageno eta elastinaren funtzionamenduan lagunduz. Gainera, azido hialuroniko molekula desberdinak existitzen direla kontutan hartuta, gure errutinarako produktua aukeratzen dugunean ezin dugu hau ahaztu.

Krema edo serumetan aurkitzen den azido hialuroniko kontzentrazioa desberdina izango da eta honen molekulak ere. Bi azido hialuroniko mota erabiltzen dira normalean kosmetikan, pisu molekular altukoa eta pisu molekular baxukoa.

Pisu molekular handiagoa edukitzeak molekula handiagoa izatea suposatzen du, eta beraz azalean kanporago geratzea, pisu molekular txikiagoa duenak azalean barrurago egin dezaken bitartean.

Normalean bi molekula motak konbinatzen dira formulazioetan hidratazio eta adinaren kontrako efektuak edukitzeko, baina hoberena zure erosketa egiterakoan lagunduko zaituen profesionalari galdetzea duzu nahi duzun efektua lortzearren.

Efektuak

Lehen ikusi dugun bezala gure gorputzak berak produzitzen du azido hialuronikoa, baina adinarekin produkzio hau kaltetuta ikusten da azalaren hidratazioa, bolumena, leuntasuna eta elastikotasuna galduz. Beraz azido hialuronikoa erabiltzeak efektu hauei aurre egiten lagundu dezake.

Onura guzti hauek, azido hialuronikoa oso erabilgarria egiten dute, substantzia honek erabilita izateko duen erraztasunak bezala. Edozein azal motan erabili daiteke, baita sentikorretan ere, eta edozein adinetan (normalena kosmetika produktu hauek 20 urtetik aurrera erabiltzen hastea da).

Gainera, bai egunez eta bai gauez sartu dezakegu gure errutinan, ez baitu fotosensibilitate arazorik sortzen. Beraz, bai, oso onuragarria izango da azido hialuronikoa gure errutinan sartzea lehen aipatutako onura guztiengatik eta, batez ere, hidratazioarengatik, estetika alde batera utzita hidratazioa ezinbestekoa delako azal osasuntsua edukitzeko.