Gezurra badirudi ere, oraindik gaur egun menopausia eta berari lotuta datozen aldaketei buruz hitz egitea kostatzen zaigu. Askotan, menopausia hitza egoera txarrekin edo ondorio negatiboekin erlazionatzen dugu, batez ere osasunean ematen diren aldaketengatik. Baina, ez da ahaztu behar, menopausia ez dela gaixotasun bat, baizik eta emakumearen bizitzan beste kapitulu bat.

Menopausia menstruazioaren betiko gelditzea da. Prozesu hau ez da bat batekoa, aurretik perimenopausia izeneko trantsizio denbora bat ematen da, 2-8 urtekoa izan daitekeena. Aipatutako denbora honetan ematen diren seinaleak eta aldaketak klimaterio dute izena.

Menopausiarekin batera datozen osasun aldaketak sexu hormona femeninoen jaitsierari lotuta datoz gehienbat. Berotasuna, suminkortasuna, urduritasuna, depresioa, nekea, insomnioa, sexu-grina falta, osteoporosia, azalaren lehortzea edo inkontinentzia dira hauetako batzuk.

Gaur baginako atrofia eta honekin datozen sintomei buruz arituko gara, lehortasuna bezala, oso ohikoa izateagatik eta askotan oso soluzio erraza edukitzeagatik gure bizi kalitatea asko hobetuz.

Bagina osasuntsua emakumearen adinarekin batera datozen baldintza fisiologiko egokiak mantentzen dituen bagina da, tokiko sintomak ematen ez dituena eta sexu-bizitza pozgarria ahalbidetzen duena.

Baginako atrofia menopausiari lotuta datorren egoera da, sintomak ematen emakume askotan. Sintoma hauek normalean baginako lehortasuna, azkura, erredura isurketa, odol jarioa eta sexu harremanetan mina izaten dira. Horrelako egoera baten aurrean, beti ginekologoarengana joango gara, egoera normala izan arren, dena behar bezala dagoen jakiteko.

Hala bada, baginarako prest dauden hidratatzaileekin hasiko dugu tratamendua eta lubrikanteak erabiliko dira sexu harremanei laguntzeko. Produktuak aukeratzeko beti profesional baten laguntza bilatzea izango da hoberena, batez ere hidratatzaileen kasuan mota askotakoak existitzen direlako eta aplikatzeko modu egokia jarraitzea oso garrantzitsua delako.

Honekin nahikoa ez bada arazoa konpontzeko medikuaren laguntza bilatuko dugu beste tratamendu mota bat probatzeko.

Beti bezala, erretzea, sedentarismoa eta gehiegizko pisua kaltegarriak izango dira baginako atrofian. Beste alde batetik, sexu harreman erregularrak eta masturbazioak menopausiaren ondorengo bagina osasuna hobetzen dute.

Ez da ahaztu behar baginaren lehortasuna ez dela menopausiarekin bakarrik agertzen. Adin gazteagotan ere eman daiteke, beraz ez lotsarik izan botikan edo beste profesional baten aurrean honekin batera datozen sintomei buruz galdetzen, azkura edo  sexu harremanetan mina sufritzen baduzu adibidez.

Batez ere azkeneko honek emakume askok sexu harremanak saihestea edo behintzat hauengatik interesa galtzea eragiten du eta, ikusi dugun bezala, askotan lubrikante eta hidratatzaileekin arazoa konpondu daiteke.

Bukatzeko, oroitu menopausia ez dela gaixotasun bat eta oso komenigarria dela ginekologora joatea erregularki, gaztetan ere, honek emakume bakoitzaren ezaugarri espezifikoak ikusi ditzan eta hauentzat soluziorik eta gomendiorik egokienak bilatu ditzan.

Batez ere,  ez lotsarik izan profesionalen laguntza bilatzerakoan oso ohiko sintomak direlako ikusitako hauek