Bidaiarien beherakoa osasunarekin erlazionatutako arazorik ohikoena da garapen bidean dauden herrialdetara bidaiatzen denean. Pertsona batek gaixotasun hau duela esaten da egunean hiru aldiz edo gehiago kaka egiten duenean eta hauek oso arinak edo likidoak direnean.

Gainera, hurrengo sintomaren bat agertu behar da: sabeleko mina, gorakadak, sukarra edo komunera joateko urgentzia. Ohikoena garapen bidean dauden herrialdeetan agertzea da, ura eta elikagaiak behar bezala tratatzeko aukera egoten ez delako eta, beraz, hauetan aurkitu daiteken patogenoren batek gaixotasuna eragin dezake.

Bidaian zehar edo bueltatu eta pixka bat geroago agertu ohi da eta, normalean, hiru edo lau egunetan desagertzen da hurrengo aholkuak jarraituz. Beherakoekin, likido eta gatz mineralak galtzen dira, beraz ezinbestekoa izango da likido asko hartzea, hidratazio sueroak erabiliz adibidez.

Alkohola, kafea eta esnekiak ez dira komeni eta egun batzuez dieta arin bat jarraitzea izango da hoberena. Beherakoen kontrako medikamentuak erabili daitezke, baina beti profesional baten aholkua jarraituz kaltegarria izan ez dadin.

Sukarra mantentzen bada, kakan odola agertzen bada, gorakoak desagertzen ez badira edo sintomak mantentzen badira edo okerrera joaten badira aurreko tratamenduak eta aholkuak jarraitu arren, profesional baten laguntza bilatu beharko da.

Zenbait gomendio

Hau gertatu ez dadin eta gure bidaia ahalik eta gehien disfrutatzearren, hona hemen gaixotasun honen agerpena saihesteko jarraitu daitezken neurri batzuk:

  • Ez erabili txorrotako ura, ez edateko ezta hortzak garbitzeko ere.
  • Erabili beti botilako ura eta konprobatu ondo itxita datorrela erosterakoan.
  • Kontuz edarietako izotzarekin, ur kutsatuarekin eginda egon baitaiteke.
  • Ez hartu esnea edo esnekirik pasteurizatuta ez badago.
  • Ez dago arazorik edari beroekin edo ur irakinarekin prestatutako gauzekin, kafea edo infusioak bezala.
  • Karbonatatuko edariak ere seguruak izaten dira.
  • Kozinatutako elikagaiak hartzea da komenigarriena, beroak eta ondo kontserbatuak.
  • Ez da komeni fruta edo barazki gordinak jatea.
  • Eskuak ondo garbitu edozein gauza jan baino lehen.

Edozein bidai egin aurretik oso komenigarria da gobernuko “Bidaiarientzako arreta zerbitzua” bisitatzea hurrengo.

Hemen, gure bidaiantzako aholku orokorrak aurkituko ditugu, baita txertoei buruzko informazioa eta herrialde desberdinen osasun egoera ezagutu dezakegu ere.

Bukatzeko, gogoratu bidaiatzeko botikin berezi bat prestatzea ezinbestekoa dela komentatutako bidaiarien beherakoari aurre egiteko eta baita agertu daitezken beste ezustekoei aurre egiteko ere, adibidez buruko mina, eguzkitako erredurak, ziztadak, zorabioak edo alergiak bezala.

Ez ahaztu gainera zure ohiko medikamentuak eramateaz eta, bidaia hegazkinez egitekotan, kontsultatu zure airelinearekin zein den medikamentu guzti hauek eramateko modu egokia arazorik ez edukitzeko.