Osteoporosia prebalentzia handiko gaixotasuna da gure ingurunean, batez ere emakumeen artean eta adineko pertsonetan. 45 urte baino gehiagoko emakumeen arteko ospitalizazio luzeenak gaixotasun honekin erlazionatutako hausturak dira.

Hezur dentsitatearen gutxitzearekin eta hezur-ehunaren narriadurarekin erlazionatutako gaixotasuna da. Bi faktore hauek hezurren hauskortasuna handitzen dute eta, ondorioz, hauek haustearen arriskua, batez ere pisu gehiago kargatzen den zonaldeetan aldaka, bizkarra edo eskumuturrak bezala.

Osteoporosiak ez du sintomarik ematen haustura ematen den arte. Haustura hauek, mingarriak izateaz gain, eguneroko bizitzan eman daitezke, ez bakarrik erortzerakoan edo kolpe batengatik, baizik eta ahalegin bat egitean adibidez eta gaixotasunaren manifestazio dira.

Normalean osteoporosiak hiru mekanismotan izan dezake jatorria: hezur-masa maila egokia ez lortzea hazkuntzan zehar, hezur-apurtzea handitzea edo hezur eratze desegokia.

Faktore desberdinek eduki dezakete eragina osteoporosiaren agerpenean. Hazkuntza urteek ezinbesteko papera jokatzen dute gaixotasun honen prebentzioan, lehen aipatutako hezur masa maila egokia lortu behar da urte hauetan zehar. Ariketa fisikoa, erretzea eta alkoholaren edo kaltzioaren kontsumoa faktore oso ezagunak dira, zuzenean eragiten baitute hezurraren mineralizazioan eta, beraz, gaixotasuna pairatzeko joeran ere.

Gaixotasunarekin erlazionatutako hainbat faktore ezin dira kontrolatu, adibidez hezur-dentsitatea jaitsi egiten da adinarekin batera 30 urtetik aurrera. Jaitsiera hau nabarmenagoa da emakumeetan, batez ere menopausiari jarraitzen dioten lehengo urteetan. Genetikak ere eragin handia dauka osteoporosiaren agerpenean, menopausia goiztiarrak bezala.

Hainbat ikerketek emakumeek osteoporosia edukitzeko arrisku gehiago dutela esaten dute, hauen hezur-masa maila gizonena baino baxuagoa delako, beraien hezurrak txikiagoak direlako, bizi itxaropen handiagoa dutelako eta menopausiak eragindako aldaketa hormonalengatik (estrogenoak prozesu honetan gehien eragiten duten hormonak dira).

Nola egin aurre osteporosiari

Beste alde batetik, existitzen dira osteoporosiaren aurka jokatzeko aukerak, beti bezala bizimoduak eragina edukiko baitu gaixotasunean. Erretzaileen hezur-dentsitatea baxuagoa izaten da, tabakoak eragin zuzena baitu hormonen mailan.

Elikadurak ere bere papera dauka, atentzio berezia jarri beharko da kaltzio eta D eta K bitaminen kontsumoan, ezinbestekoak baitira hezurren garapenean. Elikagaien kontsumoa orekatua izan behar du eta pertsonaren pisua bere adina eta alturarekin bat etorri beharko da.

Ariketa fisiko orekatua ezinbestekoa da hezur masaren galpena mantsotzeko eta, gainera, pertsonaren egoera fisikoa hobea izango da erorikoen aurrean erreakzionatzeko. Medikamentu batzuek ere hezur masa horren galpena azkartu egiten dute, hau da adibidez glukookortikoideen kasua.

Beraz, naiz eta osteoporosiak sintomarik ez eman, bere agerpena saihestu dezaketen ohitura onak jarraitu ditzakegu, beti espezialista baten laguntzarekin. Edozein susmoren aurrean medikuarengana joan diagnostiko azkar bat lortzearren.