Amaiaren zaletasuna, grina, hobeki esanda, dantza da, dantzatzea, batez ere euskal dantzak, baina latinoak ere bai. Bere afizioa ofizio bihurtu nahi izan du, halere, ez da erraza; are eta gutxiago orain, pandemia pasa eta gero.

Gainera bi alaba txiki ditu eta bere guraso Pili eta Honorio zaindu behar ditu bere anai-arrebekin batera. Ikastolako Dantza Taldea sortu zenetik, 1991tik, hor egon da; hasieran dantzari eta gero irakasle. 31 urte daramatza. Bejondeiola!

Dena dela, beste talde batzuetan ere aritu da bai helduekin bai txikiekin, baita hainbat dantza talde sortu ere han-hemenka. Gaitarekin dantzatzen diren dantzak gustuko ditu, batik bat, dantza biziak.

Festetan, ilunabarrean, plazan egongo da, beti bezala, gaitak jotzen hasi orduko, dantzatzeko prest.